एसिया कप क्रिकेट : उद्घाटन समारोहमा गायिका तृषला गुरुङले प्रस्तुति दिने
काठमाडौँ । एसिया कप क्रिकेट प्रतियोगिताको १६ औँ संस्करण आज बुधवारदेखि पाकिस्तानमा सुरु हुँदैछ । प्रतियोगिताको उद्घाटन खेलमा आयोजक पाकिस्तानले पहिलो पटक एसिया कप खेलिरहेको नेपालको सामना गर्दैछ ।
उद्घाटन खेल नेपाली समयअनुसार, दिउँसो ३ः१५ बजे सुरु हुनेछ । त्यसअघि पाकिस्तानको मुल्तान क्रिकेट रङ्गशालामा प्रतियोगिताको उद्घाटन समारोह हुनेछ । उद्घाटन समारोह नेपाली समयअनुसार, दिउँसो २ः१५ बजे सुरु हुने बताइएको छ । प्रतियोगिताको उद्घाटन समारोह धेरै लामो नहुने पाकिस्तान क्रिकेट बोर्ड (पीसीबी) ले जनाएको छ ।
प्रतियोगिताको उद्घाटन समारोहमा पाकिस्तान र नेपालका एक—एकजना गायिकाले आफ्नो प्रस्तुति दिन पीसीबीले जनाएको छ । उद्घाटन समारोहमा पाकिस्तानी गायिका आइमा बेग र नेपाली गायिका तृषला गुरुङले प्रस्तुति दिने भएका छन् ।
आइमा पाकिस्तानकी चर्चित गायिका हुन् । इन्स्टाग्राममा उनको ६० लाखभन्दा बढी फलोअर रहेका छन् । नेपाली गायिकाका तृषलाको भने इन्स्टाग्राममा दुई लाख ३९ हजार फलोअर रहेका छन् । यसका अतिरिक्त अन्य केही कलाकारले पनि उद्घाटन समारोहमा आफ्नो प्रस्तुति दिने पीसीबीले जनाएको छ ।
प्रतियोगिताको उद्घाटन समारोहमा भारतीय क्रिकेट कन्ट्रोल बोर्ड (बीसीसीआई) का अध्यक्ष रोजर बिनी र उपाध्यक्ष राजिव शुक्ला पनि उपस्थित हुने पीसीबीले जनाएको छ । पीसीबीले उद्घाटन समारोहमा अतिथिका रूपमा बीसीसीआईका सचिव जय शाहलाई पनि निम्तो पठाएको थियो । तर, एसियाली क्रिकेट काउन्सिल ९एसीसी० का अध्यक्षसमेत रहेका शाह भने उद्घाटन समारोहमा उपस्थित हुने छैनन् ।
एसिया कपमा ६ वटा राष्ट्रको सहभागिता रहेको छ । प्रतियोगिताको समूह ‘ए’ मा नेपाल र पाकिस्तानसँगै भारत पनि रहेको छ । समूह ‘बी’ मा भने श्रीलङ्का, बङ्गलादेश र अफगानिस्तान रहेका छन् । पाकिस्तानका अतिरिक्त एसिया कपका खेलहरू श्रीलंकामा पनि खेलाइने छ ।