सांसद ढाकाकुमार श्रेष्ठले बजाए रविको घन्टी, मन्त्री बन्न दुर्गा प्रसाईसँग दुई करोड माग
काठमाडौं । उपनिर्वाचनको दिन नजिकिँदै गर्दा नेपालको राजनीतिमा अर्को काण्ड सार्वजनिक भएको छ । आफूलाई भ्रष्टाचार विरोधी पार्टी भनेर जनताको सहानुभूति बटुलेर चर्चामा आएका रवि लामिछाने नेतृत्वको राष्ट्रिय स्वतन्त्र पार्टीका सांसदले मन्त्री बन्न दुई करोड रुपैयाँ माग गरेको अडियो सार्वजनिक भएको हो ।
सांसद ढाकाकुमार श्रेष्ठले आफ्नो पार्टीको भागमा स्वास्थ्य मन्त्रालय परेको र स्वास्थ्यमन्त्री साढे दुई करोड रुपैयाँ सभापति रवि लामिछानेलाई बुझाउनुपर्ने भन्दै मेडिकल माफिया दुर्गा प्रसाईसँग दुई करोड माग गरेका छन् । अडियोमा उनले भनेका छन्, ‘हाम्रो भागमा स्वास्थ्य मन्त्रालय पर्ने भयो ।
मन्त्रीका लागि रवि सरलाई दुई करोड बुझाउनुपर्ने कुरा आएको छ । मसँग पैसा छैन । अहिले एक करोड जति दिँदा हुन्छ । एक करोडचाहिँ चेक दिँदा पनि हुन्छ । त्यसैले अलिकति सहयोग चाहिएको छ ।’ जवाफमा प्रसाईंले आफूले दुई करोड उपलब्ध गराइदिने ग्यारेन्टी लिएका छन् ।
दुई करोड रकम माग भएको अडियो सार्वजनिक भएपछि रास्वपाले सांसद श्रेष्ठलाई कारबाही गर्ने तयारी गरेको छ । त्यसका लागि पार्टीमा छलफलसमेत सुरु भइसकेको बुझिएको छ । श्रेष्ठ यसअघि पनि विवादमा परेका व्यक्ति हुन् । उनले पोखराको एक सहकारीबाट करोडौं अनियमितता गरेको समाचार सार्वजनिक भएको थियो ।