फिल्मको माध्यमबाट नेपालमा पर्यटक बढाउनुपर्छ ः केसी

काठमाडौँ । चलचित्र विकास बोर्डका अध्यक्ष भुवन केसीले फिल्मको माध्यमबाट नेपालमा पर्यटक बढाउनुपर्ने बताएका छन् । प्रथम राष्ट्रिय भेला तथा चलचित्र पत्रकारिता कार्यशाला मकवानपुरमा बोल्दै उनले यस्तो बताएका हुन् । उनले नेपाली फिल्मबाट नै नेपालका मनमोहक दृश्यहरुलाई विश्वसामु देखाउन सक्नुपर्ने बताए । उनले मुस्ताङ, मनाङ लगायतका स्थानमा नेपाली चलचित्र कैद गरेर प्रदर्शन गर्दा आन्तरिक र बाह्य पयर्टकहरु बढाएको बताए । उनले नेपाली चलचित्रलाई विश्वमाझ पु¥याउने चुनौती अबका दिनमा नेपाली चलचित्रकर्मीहरुसँग रहेको बताए । उनले विदेशी दर्शकलाई पनि टार्गेट गरेर आगामी दिनमा चलचित्र निर्माण गर्नुपर्ने बताए । कार्यक्रममा अभिनेत्री केकी अधिकारीले सिनेमा पर्यटनलाई विशेष जोड दिन आवश्यक रहेको बताइन् । उनले सिनेमामा नेपाली सौन्दर्यताहरुर कैद गरेर ती दृश्यहरु प्रस्तुत गर्दा आन्तरिक र बाह्य पर्यटकहरु बढेको बताइन् । उनले नेपालका प्राकृतिक सौन्दर्यतासँगै नेपाली चलचित्रका लागि आन्तरिक सम्भावना भएका ठाउँलाई पर्यटकीय गन्तव्यका रुपमा विकास गर्न आवश्यक रहेको बताइन् । स्थानीय तहले नै यसबारेमा बढी ध्यान दिन आवश्यक रहेको उनले बताइन् । कार्यक्रममा अभिनेता तथा निर्देशक निश्चल बस्नेतले दिमाग खराबको रिभ्युमा रंगपत्रकारहरुले गरेको रिभ्युमा आक्रोश व्यक्त गरे । फिल्म पत्रकारले फिल्मको बारेमा भन्दा बढी फलानो पार्टीलाई पोस्न फिल्म बनाइयो भन्ने किसिमको रिभ्यु लेखेको भन्दै आक्रोश जनाए । फिल्मलाई फिल्मको नजरबाट हेर्न आवश्यक रहेको उनले बताए ।