हस्तकला व्यवसायमा जोडिँदै दाङका थारु महिला
घोराही । दाङका महिला पछिल्लो समय हस्तकला व्यवसायमा सरिक हुन थालेका छन् । हस्तकलाका विभिन्न सामग्री सामग्री बनाएर उनीहरू आकर्षक आम्दानीसमेत गर्न थालेका छन् ।
हस्तकलाका सामग्री उत्पादनका माध्यमबाट आयआर्जनका गतिविधिमा जोडिएपछि घर चलाउन सहजतासँगै बचतसमेत गर्ने गरेको लमही नगरपालिका ५ निवासी सरिता चौधरी बताउँछिन् । हस्तकलासम्बन्धी ‘मेरी हस्तकला उद्योग’ स्थापना गरेर व्यवसाय गर्दै आएकी उनले कला, संस्कृतिको संरक्षणसँगै आफूजस्ता महिलाका लागि आम्दानीको स्रोत बनेको बताइन् । ‘हस्तकलासम्बन्धी काम गर्दा हराउँदै गएको सीपको संरक्षणसँगै व्यवसायबाट आम्दानी हुने गरेको छ’, उनले भनिन् । उनका अनुसार थारू समुदायसँग सम्बन्धित हस्तकलाका सामग्री खपत राम्रो हुने भएकाले बनाउन सके महिनामा १५–२० हजार रुपैयाँ सजिलै कमाउन सकिन्छ ।
हस्तकला व्यवसाय नगर्दा घरको काम सकेर फुर्सदिलो भएर बस्नुपर्ने भए पनि काम सुरु गरेपछि पछिल्लो समय फुर्सद नहुने गरेको चौधरीको भनाइ छ । उनले भनिन्, ‘घरमा काम नहुँदा पहिले दिनभर गफगाफसँगै टिभी, मोबाइल हेरेर समय बित्थ्यो, अहिले कामले गर्दा फुर्सद हुँदैन ।’ चौधरीले गमला, ढकिया, टोकरी, पेनहोल्डर, हटकेस, थाल टोकरी, ट्रेलगायतका सामग्री बनाउँदै आएकी छन् । सरिताजस्तै सुमित्रा चौधरी पनि हस्तकलाका सामग्री उत्पादन गरी आम्दानी गर्दै आएकी छन् । ३ वर्षअघि सीप सिकेर हस्तकलाका सामग्री उत्पादनमा लागेकी उनले महिनामा २० हजार रुपैयाँसम्म कमाउने गरेको बताइन् ।
घरको काम गरेर बचेको फुर्सदको समयमा आफूले सामग्री बनाएर बिक्री गर्ने गरेको चौधरीको भनाइ छ । ‘घरको कामसँगै हस्तकलाका सामग्री उत्पादन गर्नुपर्ने भएकाले धेरै समय मिल्दैन’, उनले भनिन्, ‘सामग्री उत्पादनमा मात्रै लाग्नुभएका महिलाले महिनामा ३० हजार रुपैयाँसम्म कमाउने गर्नुभएको छ ।’
उनीहरुले काठमाडौंमा धेरै बिक्री हुने सामग्री मागअनुसार उत्पादन गर्दै आएका छन् ।